Bæjarfulltrúar 2010-2014

Andrea Sigrún Hjálmsdóttir
er kosin af V-lista Vinstri hreyfingarinnar græns framboðs.

Andrea fæddist árið 1970 á Akranesi en hefur verið búsett á Akureyri síðastliðin 10 ár. Hún lauk sveinsprófi í gullsmíði árið 1996 og starfaði sem slíkur til ársins 2002 þegar hún hóf nám í Háskólanum á Akureyri. Þaðan útskrifaðist hún með BA gráðu í nútímafræði og samfélags­ og hagþróunarfræði. Andrea lauk meistaraprófi í félagsfræði frá Háskólanum í Bresku Kólumbíu haustið 2009 og starfar sem lektor við hug-­ og félagsvísindasvið Háskólans á Akureyri.

Hún er gift Halli Gunnarssyni, tölvunarfræðingi og þau eiga tvær dætur, Fönn 10 ára og Dögun 5 ára. Andrea tekur þátt í pólitík vegna þess að hún vil leggja sitt af mörkum til að byggja réttlátt og framsýnt þjóðfélag.

Nefndir og ráð 2010-2014:

• Stjórnsýslunefnd
• Áheyrnarfulltrúi í bæjarráði

Netfang: andrea@kanada.is  

Geir Kristinn Aðalsteinsson
er kosinn af L-lista fólksins.

Geir Kristinn Aðalsteinsson er fæddur á Akureyri þann 7. febrúar 1975. Hann ólst upp á Akureyri, varð stúdent frá VMA árið 1996 og útskrifaðist sem viðskiptafræðingur frá Háskólanum á Akureyri árið 2002. Geir Kristinn fluttist ásamt fjölskyldu sinni til Árósa í Danmörku árið 2004 og lauk þar mastersnámi í markaðsfræðum (d. Marketingøkonomi).  Geir Kristinn hóf störf sem viðskiptastjóri á fyrirtækjasviði Vodafone í Reykjavík árið 2006. Hann fluttist aftur til Akureyrar árið 2007 ásamt fjölskyldu sinni, tók við starfi rekstrarstjóra Vodafone á Norðurlandi og starfar við það.

Geir Kristinn lék handknattleik til fjölda ára með Þór, KA og KR og hefur þjálfað unglingaflokka í handknattleik síðastliðin þrjú ár.

Geir Kristinn er í sambúð með Lindu Guðmundsdóttur bankastarfsmanni og eiga þau saman þrjá drengi.

Nefndir og ráð 2010-2014:

• Forseti bæjarstjórnar
• Bæjarráð, varaformaður 

Netfang: geir@akureyri.is 

Guðmundur Baldvin Guðmundsson
er kosinn af B-lista Framsóknarflokksins.

Guðmundur Baldvin Guðmundsson er fæddur 18. desember 1962 á Akureyri. Guðmundur er stúdent frá Verkmenntaskólanum á Akureyri, hefur lokið þriggja anna rekstrar- og viðskiptanámi frá  Háskólanum á Akureyri og lauk prófi í verðbréfaviðskiptum 2006. Hann hefur m.a. starfað hjá Ríkisskattstjóra, Endurskoðun Akureyri (nú KPMG) og í 10 ár starfaði hann hjá Samherja hf. síðustu árin sem fjármálastjóri fyrirtækisins.  Hann starfar nú sem skrifstofustjóri Stapa lífeyrissjóðs.

Guðmundur hefur tekið virkan þátt í félagsstörfum m.a. hjá Knattspyrnufélagi Akureyrar þar sem hann sat í aðalstjórn félagsins um tíma, hefur auk þess setið í stjórnum ýmissa félaga og syngur í Karlakór Akureyrar Geysi.

Guðmundur er kvæntur Soffíu Gísladóttur forstöðumanni Vinnumálastofnunar á Norðurlandi og eiga þau samtals 7 börn á aldrinum 10 til 25 ára.

Nefndir og ráð 2010-2014:

• Bæjarráð
• Stjórnsýslunefnd 

Netfang: gbg1@simnet.is 

Halla Björk Reynisdóttir
er kosin af L-lista fólksins. 

Halla Björk Reynisdóttir er fædd á Akureyri 17. september 1967. Hún ólst upp á Akureyri og Ísafirði og varð stúdent frá MA 1988. Halla Björk lauk atvinnuflugmannsnámi árið 1990. Eftir að hafa stofnað fjölskyldu hóf Halla Björk nám við flugumferðarstjórn og hefur unnið sem flugumferðarstjóri á Akureyrarflugvelli síðan 1998. Halla Björk útskrifaðist síðan sem viðskiptafræðingur á stjórnunarsviði frá Háskólanum á Akureyri vorið 2009. Halla Björk hefur tekið virkan þátt á félagsmálum og meðal annars setið í stjórn FÍF.

Halla Björk er gift Prebeni Jóni Péturssyni framkvæmdarstjóra og eiga þau saman þrjú börn, þau Margréti Ýri 19 ára, Reyni Dag 15 ára og Halldóru Kolku 8 ára.

Nefndir og ráð 2010-2014: 

• Bæjarráð
• Stjórn Akureyrarstofu, formaður 

Netfang: hallabjork@akureyri.is  

Hermann Jón Tómasson
er kosinn af S-lista Samfylkingarinnar.

Hermann Jón Tómasson er fæddur á Akureyri 13. apríl 1959. Hann ólst upp á Dalvík og stundaði nám í Dalvíkurskóla, Menntaskólanum á Akureyri, Háskóla Íslands og í Texas Tech University. Hann hefur einnig stundað nám í stjórnun við kennaradeild Háskólans á Akureyri. Hermann hefur lengst af unnið við kennslu, ráðgjöf og stjórnun í Verkmenntaskólanum á Akureyri.

Hermann var varabæjarfulltrúi Samfylkingarinnar 2002-2006 og bæjarfulltrúi 2006-2010. Hann var formaður bæjarráðs frá 2006 þar til hann tók við starfi bæjarstjóra í júní 2009. Hermann hefur jafnframt gengt ýmsum trúnaðarstörfum fyrir bæjarfélagið á þessum tíma.

Hermann er kvæntur Báru Björnsdóttur leikskólakennara og eiga þau þrjú börn: Tómas fæddur 1981, Harpa fædd 1988 og Bjarki fæddur 1996.

Nefndir og ráð 2010-2014:

• Áheyrnarfulltrúi í bæjarráði 

Netfang: hermann@akureyri.is 

Hlín Bolladóttir
er kosin af L-lista fólksins.

Hlín Bolladóttir er fædd á Akureyri þann 22. júlí 1963, bjó fyrstu tvö ár ævinnar í Hrísey en er annars alin upp í Laufási við Eyjafjörð. Hún varð stúdent frá MA árið 1982. Í framhaldi af því kenndi hún einn vetur í Gagnfræðaskólanum á Akureyri og fór síðan til náms í lýðháskóla í Noregi í eitt ár. Hlín útskrifaðist frá Kennaraháskóla Íslands árið 1987 og hefur kennsla verið hennar aðalstarf síðan auk þess sem hún hefur tekið virkan þátt í félagsstarfi með unglingum. Hlín stundaði nám í nútímafræði við HA árin 2007-2009. Hún flutti til Akureyrar haustið 2009 og er nú kennari við Oddeyrarskóla á Akureyri.

Hlín á börnin Gyrði Örn Egilsson og Þórunni Þöll Egilsdóttur.

Nefndir og ráð 2010-2014:

• Samfélags- og mannréttindaráð
• Stjórnsýslunefnd 

Netfang: smarinn9@mi.is 

Inda Björk Gunnarsdóttir
er kosin af L-lista fólksins.

Inda Björk Gunnarsdóttir er fædd þann 17. maí 1971. Inda Björk ólst upp á Akureyri, stundaði nám í Glerárskóla og síðan við VMA. Árið 1991 hóf hún nám við Fóstruskóla Íslands og útskrifaðist þaðan sem leikskólakennari árið 1994. Að loknu námi fluttist hún á Siglufjörð þar sem hún starfaði við leikskólann Leikskála í tvö ár, bæði sem deildarstjóri og aðstoðarskólastjóri. Árið 1996 fluttist Inda Björk til Noregs. Fyrstu tvö árin starfaði hún sem aupair en síðar sem skólastjóri leikskólans Skaubo í Bærum, Noregi. Eftir fjögurra ára dvöl í Noregi og áður en hún hélt aftur heim til Íslands, dvaldist hún hálft ár í Sitges á Spáni og hálft ár á Rarotonga í Suður-Kyrrahafi.

Eftir heimkomuna 2001 hefur Inda Björk meðal annars starfað á leikskólanum Krógabóli, skóladeild Akureyrar og síðan í ágúst 2003 sem aðstoðarskólastjóri leikskólans Naustatjarnar.

Inda Björk er gift Guðna Hannesi Guðmundssyni mjólkurfræðingi og eiga þau tvö börn, Dag 4 ára og Dagmar 2 ára. Fyrir á Guðni Hannes dótturina Sigrúnu Lilju.

Nefndir og ráð 2010-2014:

• Félagsmálaráð, formaður 

Netfang: indabjork@akureyri.is 

Oddur Helgi Halldórsson
er kosinn af L-lista fólksins.

Oddur Helgi Halldórsson er fæddur á Akureyri 24. mars 1959. Hann er blikksmíðameistari og hefur rekið fyrirtækið Blikkrás ehf. í 25 ár. Oddur útskrifaðist auk þess sem iðnrekstrarfræðingur frá Háskólanum á Akureyri 1992. Foreldrar hans eru Sigríður Kristjánsdóttir úr Bótinni í Glerárhverfi og Halldór Árnason (Dóri skó).

Oddur Helgi var varamaður í bæjarstjórn frá 1994 en aðalmaður frá 1997. Frá 1998 hefur Oddur Helgi  verið bæjarfulltrúi fyrir L-listann, lista fólksins, á Akureyri. Hann hefur setið í bæjarráði frá 1998. Einnig hefur hann setið í íþrótta- og tómstundaráði (1994-1998), byggingarnefnd (1994-1998), hafnarnefnd (1998-2002), stjórn Norðurorku (1998-2002), framkvæmdaráði og stjórn Fasteigna (2002-2006), stjórnsýslunefnd frá 2002 og í stjórn lífeyrissjóðs STAK frá 2002. Auk þess hefur Oddur Helgi setið í fjölmörgum vinnuhópum og nefndum fyrir hönd bæjarins.

Oddur Helgi er kvæntur Margréti Hörpu Þorsteinsdóttur skólaliða og eiga þau þrjú börn:  Helgu Mjöll fatahönnuð fædda 1980, hún er gift Degi Fannari Dagssyni og eiga þau dótturina Mónu Ísafold fædda 2006. Halldór héraðsdómslögmann  fæddan 1983, hann er í sambúð með Mattheu Oddsdóttur lögfræðingi, og að lokum Júlíu Þóru fædda 1995.

Nefndir og ráð 2010-2014:

• Bæjarráð, formaður
• Framkvæmdaráð, formaður 

Netfang: oddurhelgi@akureyri.is 

Ólafur Jónsson
er kosinn af D-lista Sjálfstæðisflokks.

Ólafur er fæddur árið 1957 í Ósló en ólst upp á Egilsstöðum. Hann lauk landsprófi frá Alþýðuskólanum á Eiðum og brautskráðist sem stúdent frá Menntaskólanum við Tjörnina árið 1977. Hann lauk Cand.med vet.-prófi frá Dýralæknaháskólanum í Ósló í desember 1982. Hann hefur einnig lokið 3ja anna framleiðslutækninámi við Landbúnaðarháskólann að Ási í Noregi árið 1996 og stjórnunarnámi á vegum Símenntunar Háskólans á Akureyri og Eyþings vorið 2003. Ólafur var framkvæmdastjóri Bústólpa ehf á Akureyri frá 2001-2007 og þar áður starfaði hann sem gæðastjóri Kaldbaks og mjólkursamlagsins á Akureyri. Hann hefur einnig starfað við stundakennslu, rannsóknir, og ráðgjöf í gæðastjórnun. Ólafur er héraðsdýralæknir í Skaga- og Eyjafjarðarumdæmi.

Ólafur er kvæntur Eddu Kristrúnu Vilhelmsdóttur, þjóðfélagsfræðingi og eiga þau tvo syni.

Nefndir og ráð 2010-2014:

• Bæjarráð
• Stjórnsýslunefnd 

Netfang: olafurjons@akureyri.is 

Sigurður Guðmundsson
er kosinn af A-lista Bæjarlistans.

Sigurður er fæddur í Kaupmannahöfn þann 8 mars 1969. Hann hefur alist upp og búið á Akureyri frá eins árs aldri. Sigurður lauk stúdentsprófi af verslunarbraut í VMA 1989. Að stúdentsprófi loknu vann hann ýmis störf og vann m.a. mikið sem sjómaður. Fyrir um 10 árum síðan opnaði  hann verslunina Víking og rekur nú Víkingsverslanir bæði á Akureyri og í Reykjavík.

Sigurður er kvæntur Jónborgu Sigurðardóttur, myndlistarmanni, sem er fædd 2. júlí 1966. Saman eiga þau þrjú börn; Kolfinnu Frigg f. 1998, Guðmund Karl f. 1999 og Sjöfn f. 2006.  Auk þess sem hann á 2 stjúpbörn, þ.e.a.s. eldri börn Jónborgar, Sigurð Dóra f. 1984 og Selmu f. 1988.

Nefndir og ráð 2010-2014:

• Skipulagsnefnd
• Áheyrnarfulltrúi í bæjarráði

Netfang: sigurdur@akureyri.is 

Tryggvi Þór Gunnarsson
er kosinn af L-lista fólksins.

Tryggvi Gunnarsson er fæddur í Reykjavík þann 13. maí 1965. Hann stundaði nám í uppeldisfræði við Fjölbrautaskólann í Breiðholti. Tryggvi hefur meðal annars starfað í Búnaðarbanka Íslands hinum forna, sem sölumaður hjá Toyota og í heildversluninni Innnes. Hann starfar nú sem deildarstjóri hjá Húsasmiðjunni.

Tryggvi hefur víða komið við í félagsmálum og til að mynda þjálfað knattspyrnu hjá Knattspyrnufélagi Akureyrar til fjölda ára auk þess að vera varaformaður aðalstjórnar K. A. Tryggvi hefur setið í stjórn Akureyrarstofu auk þess að hafa setið í ýmsum nefndum fyrir hönd L-listans svo sem áfengis- og vímuvarnarnefnd, jafnréttisnefnd og sem varamaður í skólanefnd.

Tryggvi er kvæntur Auði Þorsteinsdóttur og eiga þau 4 börn.

Nefndir og ráð 2010-2014:

• Samfélags- og mannréttindaráð, varaformaður
• Stjórnsýslunefnd, formaður 

Netfang: tryggvig@akureyri.is