Bæjarstjórnarkosningar fóru fram 27. maí 2006. Sex listar voru boðnir fram. Úrslit kosninganna urðu sem hér segir:
| B - listi Framsóknarflokksins |
1.427 atkv. |
15,08% |
1 bæjarfulltrúar |
| D - listi Sjálfstæðisflokksins |
2.950 atkv. |
31,18% |
4 bæjarfulltrúar |
| L - listi fólksins |
906 atkv. |
9,58% |
1 bæjarfulltrúar |
| O - listi Framfylkingarflokksins |
299 atkv. |
3,16% |
0 bæjarfulltrúi |
| S - listi Samfylkingarinnar |
2.190 atkv. |
23,15% |
3 bæjarfulltrúar |
| V - listi Vinstri hreyfingarinnar - græns framboðs |
1.506 atkv. |
15,92% |
2 bæjarfulltrúar |
Á kjörskrá voru 12.066. Utan kjörfundar kusu 1.245 en á kjördag sjálfan kusu 8.216, eða samtals 9.461. Kosningaþátttaka var því 78,4%. Auðir kjörseðlar voru 168 og ógildir 15.
Bæjarfulltrúar á kjörtímabilinu 2006 - 2010 eru þessir:
 |
Baldvin Halldór Sigurðsson Baldvin er fæddur á Akureyri árið 1953. Hann er sonur Sigurðar Baldvinssonar frá Naustum og Ragnheiðar Pálsdóttur frá Grund á Jökuldal. Baldvin er gagnfræðingur frá Gagnfræðaskóla Akureyrar. Hann útskrifaðist frá Hótel- og veitingaskóla Íslands árið 1974 og hefur starfað við iðn sína að mestu síðan þá auk þess sem hann hefur unnið við hótelstjórn. Hann sérhæfði sig í lífrænu grænmeti og fornum íslenskum mat og matarvenjum. Baldvin starfaði sem körfuknattleiksþjálfari og formaður unglingaráðs körfuknattleiksdeildar Þórs um árabil. Baldvin er kvæntur Ingu Þórhildi Ingimundardóttur frá Brekku í Núpasveit og eiga þau soninn Jón Inga sem er fæddur 1981. Nefndir og ráð 2006 - 2010:
Netfang: baldvin@akureyri.is |
 |
Elín Margrét Hallgrímsdóttir Elín Margrét er fædd 17. október 1953 og ólst upp á Laxamýri í Suður Þingeyjarsýslu. Eftir nám í Laugaskóla, framhaldsdeild Víghólaskóla og Húsmæðraskóla Reykjavíkur stundaði hún nám í Hjúkrunarskóla Íslands og síðar við Nýja Hjúkrunarskólann. B.Sc. prófi í hjúkrunarfræði lauk Elín Margrét 1995 frá Háskólanum á Akureyri og síðan meistaragráðu í sömu grein með áherslu á stjórnun frá Glasgow Háskóla á Skotlandi. Hún stundaði píanó- og tónfræðinám í sex ár við Nýja Tónlistarskólann og Tónlistarskólann á Akureyri og einnig söngnám þar í hálft þriðja ár. Elín Margrét starfaði lengi við Fjórðungssjúkrahúsið á Akureyri: á handlækningadeild, sem deildarstjóri á gjörgæslu- og lyfjadeildum en síðast á slysadeild og sem verkefnisstjóri í áfallahjálp. Í nokkur ár starfaði hún sem sérfræðingur á gjörgæsludeild í Noregi og um tíma við skóla- og heimahjúkrun á Heilsugæslustöð Akureyrar. Hún hóf störf sem sérfræðingur við Rannsóknarstofnun Háskólans á Akureyri árið 1999 og sem símenntunarstjóri Háskólans árið 2000. Hún hefur verið stundakennari við Háskólann á Akureyri síðan 1995. Elín Margrét er gift Kjartani Helgasyni lögreglumanni. Börn þeirra eru Jón Helgi, fæddur 1990 og Freydís Björk, fædd 1994. Nefndir og ráð 2006 - 2010:
Netfang: elinh@akureyri.is eða emh@unak.is |
 |
Helena Þuríður Karlsdóttir Helena Þuríður Karlsdóttir fæddist árið 1967. Hún lauk stúdentsprófi frá Menntaskólanum í Reykjavík og lauk lögfræðiprófi frá Lagadeild Háskóla Íslands. Héraðsdómslögmannsréttindi fékk hún árið 1999. Vorið 2005 lauk hún þriggja anna námi í rekstrar- og viðskiptafræðum frá Endurmenntun Háksólans á Akureyri. Að auki hefur hún sótt ýmis styttri námskeið við ýmsar menntastofnanir. Helena hefur starfað sem löglærður fulltrúi á lögmannsstofu og sem löglærður fulltrúi hjá Sýslumanninum á Akureyri. Einnig hefur hún fengist við ýmis lögfræðileg verkefni og kennslu. Helena hefur verið forstöðumaður Svæðisvinnumiðlunar Norðurlands eystra frá árinu 1998. Helena hefur ekki áður setið í bæjarstjórn. Eiginmaður Helenu er Guðjón J. Björnsson, löglærður fulltrúi og staðgengill sýslumannsins á Akureyri. Nefndir og ráð 2006 - 2010:
Netfang: helenak@akureyri.is |
 |
Hermann Jón Tómasson Hermann fæddist árið 1959 og ólst upp á Dalvík. Hann stundaði nám í Dalvíkurskóla, Menntaskólanum á Akureyri, Háskóla Íslands og í Texas Tech University. Hann hefur einnig stundað nám í stjórnun við kennaradeild Háskólans á Akureyri. Hann hefur lengst af unnið við kennslu, ráðgjöf og stjórnun í framhaldsskólum, fyrst við Fjölbrautaskóla Vesturlands, síðan í MA og frá 1989 í VMA. Hermann var varabæjarfulltrúi Samfylkingarinnar 2002-2006. Hermann er kvæntur Báru Björnsdóttur leikskólakennara og eiga þau þrjú börn, Tómas, fæddur 1981, Harpa, fædd 1988 og Bjarki, fæddur 1996. Nefndir og ráð 2006 - 2010:
Netfang: hermann@akureyri.is |
 |
Hjalti Jón Sveinsson er kosinn af D-lista Sjálfstæðisflokks Hjalti Jón er fæddur árið 1953. Hann brautskráðist sem stúdent frá Menntaskólanum við Hamrahlíð 1973. Hann lauk Cand. Mag.-prófi í íslenskum bókmenntum frá Háskóla Íslands 1986 og kennsluréttindanámi frá sama skóla 1994. Hann hefur stundað framhaldsnám í stjórnun og skólastarfi við Kennaraháskóla Íslands. Kennslu stundaði Hjalti Jón samhliða háskólanámi á árunum 1975 -1982. Þá starfaði hann við ritstjórn, ritstörf og blaðamennsku á árunum 1982 -1994, þar af 3 ár í Þýskalandi. Hann var skólameistari Framhaldsskólans á Laugum 1994 -1999 og hefur starfað sem skólameistari Verkmenntaskólans á Akureyri frá 1999. Hjalti Jón er faðir fjögurra barna sem fædd eru 1976, 1978, 1980 og 2001. Nefndir og ráð 2006 - 2010:
Netfang: hjaltijon@akureyri.is / hjalti@vma.is |
 |
Jóhannes Gunnar Bjarnason Jóhannes fæddist árið 1962. Hann er íþróttakennari og starfar við Brekkuskóla. Hann hefur starfað sem þjálfari hjá KA í rúm 20 ár í handknattleik og knattspyrnu þar af meistaraflokksþjálfari í þrjú ár. Jóhannes hefur setið í bæjarstjórn frá árinu 2002. Hann er fæddur og uppalinn á Akureyri og hefur búið í bænum alla tíð utan fjögurra námsára. Jóhannes er kvæntur Kristínu Hilmarsdóttur tryggingaráðgjafa og eiga þau tvær dætur, Arndísi sem er fædd 1991 og Bjarneyju Hilmu sem er fædd 2006. Nefndir og ráð 2006 - 2010:
Netfang: joigb@akureyri.is |
 |
Kristín Sigfúsdóttir Kristín er fædd að Gunnarsstöðum í Þistilfirði 13. mars 1949. Hún lauk prófum frá: Laugaskóla í S-Þing, Húsmæðraskóla Borgfirðinga að Varmalandi og Hússtjórnarkennaraskóla Íslands. Hún tók stúdentspróf frá MA 1975, stundaði nám í næringarfræði í Kanada. Lauk uppeldis- og kennslufræði frá Kennaraháskóla Íslands 1986 og leiðsögumannaprófi 1997 frá Leiðsöguskólanum. Kristín lauk meistaraprófi í umhverfisfræðum frá Háskóla Íslands vorið 2005. Lokaritgerðina vann hún með Sóleyju Jónasdóttur líffræðingi og fjallaði ritgerðin um umhverfisvísa fyrir Akureyrarbæ, þar sem rannsókn á svifryki á Akureyri var hluti af verkefninu. Kristín hefur setið í nefndum á vegum Akureyrarbæjar um margra ára skeið, bæði fyrir Alþýðubandalagið og Vinstrihreyfinguna grænt framboð. Nú síðast í félagsmálaráði og stjórn Norðurorku. Kristín hefur kennt við Menntaskólann á Akureyri síðan 1983. Eiginmaður Kristínar er Ólafur H. Oddsson læknir. Þau eiga þrjá uppkomna syni og sex barnabörn. Þau hafa búið á Akureyri frá árinu 1972. Nefndir og ráð 2006 - 2010:
Netfang: krissi@akureyri.is |
|
|
Oddur Helgi Halldórsson Oddur Helgi fæddist árið 1959 og ólst upp á Akureyri. Hann er blikksmíðameistari og iðnrekstrarfræðingur og rekur eigið fyrirtæki, Blikkrás. Hann var vara- og aðalbæjarfulltrúi Akureyrarbæjar fyrir Framsóknarflokkinn á árunum 1994-1998 og bæjarfulltrúi fyrir L-lista, lista fólksins frá árinu 1998. Eiginkona Odds Helga er Margrét Harpa Þorsteinsdóttir og eiga þau 3 börn; Helgu Mjöll, Halldór og Júlíu Þóru. Nefndir og ráð 2006 - 2010:
Netfang: oddurhelgi@akureyri.is
|
 |
Ólafur Jónsson Ólafur er fæddur árið 1957 í Ósló en ólst upp á Egilsstöðum. Hann lauk landsprófi frá Alþýðuskólanum á Eiðum og brautskráðist sem stúdent frá Menntaskólanum við Tjörnina árið 1977. Hann lauk Cand.med vet.-prófi frá Dýralæknaháskólanum í Ósló í desember 1982. Hann hefur einnig lokið 3ja anna framleiðslutækninámi við Landbúnaðarháskólann að Ási í Noregi árið 1996 og stjórnunarnámi á vegum Símenntunar Háskólans á Akureyri og Eyþings vorið 2003. Ólafur var framkvæmdastjóri Bústólpa ehf á Akureyri frá 2001-2007 og þar áður starfaði hann sem gæðastjóri Kaldbaks og mjólkursamlagsins á Akureyri. Hann hefur einnig starfað við stundakennslu, rannsóknir, og ráðgjöf í gæðastjórnun. Ólafur er héraðsdýralæknir í Skaga- og Eyjafjarðarumdæmi. Ólafur er kvæntur Eddu Kristrúnu Vilhelmsdóttur, þjóðfélagsfræðingi og eiga þau tvo syni. Nefndir og ráð 2006-2010:
Netfang: olafurjons@akureyri.is |
 |
Sigrún Björk Jakobsdóttir Sigrún Björk er fædd 23. maí árið 1966. Hún er stúdent frá Menntaskólanum við Sund og útskrifaðist úr IHTTI hótelstjórnunarskólanum í Sviss árið 1990. Einnig hefur hún lokið 30 eininga námi í nútímafræðum við Háskólann á Akureyri og lauk stjórnunarnámi á vegum Símenntunar Háskólans á Akureyri og Eyþings vorið 2006. Sigrún hefur starfað sem hótelstjóri á Hótel Austurlandi, í sölu- og markaðsdeild Hótel Íslands, verið hótelstjóri á Hótel Norðurlandi, deildarstjóri hjá Úrvali-Útsýn, verkefnastjóri hjá Menntasmiðjunni á Akureyri og verkefnastjóri hjá Price Waterhouse Coopers. Sigrún Björk tók sæti í bæjarstjórn Akureyrar árið 2002 og var ritari Sjálfstæðisfélags Akureyrar 2003 til 2004. Sigrún Björk er gift Jóni Björnssyni, framkvæmdastjóra Lífsvals, og eiga þau tvö börn. Nefndir og ráð 2006 - 2010:
Netfang: sigrun@akureyri.is |
 |
Sigrún Stefánsdóttir Sigrún fæddist árið 1967 og ólst upp á Dalvík. Hún hefur búið á Akureyri frá 1989. Var eina önn í Menntasmiðju kvenna. Hún er stúdent frá Verkmenntaskólanum á Akureyri. Sigrún starfar sem sölu- og þjónustufulltrúi hjá Íslensk Ameríska. Sigrún hefur ekki áður setið í bæjarsjórn. Börn Sigrúnar eru Birgir Örn, Jón Geir, Harpa og Svala. Nefndir og ráð 2006 - 2010:
Netfang sigrunst@akureyri.is eða sigrunstef@simnet.is |
Kristján Þór Júlíusson sat sem bæjarfulltrúi frá upphafi kjörtímabilsins og fram í byrjun janúar 2010 þegar Ólafur Jónsson kom inn í bæjarstjórn sem aðalmaður.
Varabæjarfulltrúar kjörtímabilið 2006 - 2010:
Gerður Jónsdóttir (B)
Ólafur Jónsson til 1. janúar 2010 (D)
Þórarinn B. Jónsson til 19. janúar 2010 (D)
María H. Marinósdóttir (D)
María Egilsdóttir til 2. október 2007 (D)
Baldur Dýrfjörð frá 2. október 2007 (D)
Anna Halla Emilsdóttir (L)
Ásgeir Magnússon (S)
Margrét Kristín Helgadóttir (S)
Jón Ingi Cæsarsson (S)
Dýrleif Skjóldal Ingimarsdóttir (V)
Jón Erlendsson (V)
Jóhanna H. Ragnarsdóttir frá 19. janúar 2010 (D)
Bjarni Jónasson frá 19. janúar 2010 (D)
