Mynd: Ragnhildur Aðalsteinsdóttir.
Fundur um póstþjónustu framtíðarinnar verður haldinn fimmtudaginn 23. október kl. 17.00-18.30 í Menningarhúsinu Hofi. Þetta er opinn
fundur fyrir alla sem láta sig þessi mál varða. Miklar breytingar hafa orðið síðastliðin ár á samskiptamynstri einstaklinga jafnt sem
fyrirtækja.
Almenningur sækist ekki eftir sömu þjónustu og hann gerði áður fyrr. Rafræn samskipti hafa aukist verulega og hafa þau haft umtalsverð
áhrif á póstþjónustuna. Mikill samdráttur hefur verið í bréfasendingum en á móti hefur orðið aukning í
öðrum þáttum, eins og t.d. pakkasendingum og annarri dreifingarþjónustu. Þessar breytingar kalla á nýjar áherslur í
póstþjónustunni.
Þrátt fyrir minnkandi bréfamagn gera ýmsir kröfu á Póstinn um að halda úti óbreyttri þjónustu. Pósturinn vill
því eiga samtal við notendur póstþjónustunnar, bæði einstaklinga og fulltrúa fyrirtækja, um raunverulegar þarfir þeirra
á sviði póstþjónustu og hvernig tryggja megi fjármögnun hennar nú og í framtíðinni.
Forsvarsmenn Íslandspósts halda opna fundi á Egilsstöðum, Húsavík og Akureyri í næstu viku. Þetta er liður í
fundarröð um stöðu og framtíð póstmála á Íslandi. Skoðun landsmanna á póstmálum er mjög mikilvæg fyrir
fyrirtækið. Vonast er til að sem flestir mæti og taki þátt í umræðum um hvernig póstþjónusta framtíðarinnar eigi
að vera.