Beðið eftir kuldatíð

Mynd: Auðunn Níelsson.

Nú er aðeins farið að kólna eftir einmuna veðurblíðu í Eyjafirði í haust. Viðvarandi fjögurra gráðu frost eða meira þarf að vera í Hliðarfjalli til þess að snjóframleiðsla geti hafist en stefnt er að því að opna skíðasvæðið fyrir áramót ef hægt er og veður leyfir.

Nú eru sex starfsmenn að undirbúa vetrarstarfið í Hlíðarfjalli en fleiri verða ráðnir tímabundið eins og vant er þegar aðsókn er hvað mest eftir áramótin.

Guðmundur Karl Jónsson forstöðumaður skíðasvæðisins í Hlíðarfjalli segir að nú sé bara beðið eftir frostinu og snjónum, engin leið sé að segja nákvæmlega til um hvenær skíðasvæðið verði opnað, það ráðist fyrst og fremst af tíðarfari.