Frá Friðarvökunni. Mynd: Ragnar Hólm Ragnarsson.
Akureyrarvaka fór fram um helgina í blíðskaparveðri, allt að 20 gráðu hita. Mikill mannfjöldi tók þátt í þessari
afmælishátíð kaupstaðarins og var einkennandi hversu margir bæjarbúar lögðu sitt af mörkum, fyrir utan allt listafólkið sem
lét ljós sitt skína.
Hápunktur hátíðarhaldanna var á laugardagskvöld þegar hljómsveitin Amabadama hélt stóra útitónleika í
Listagilinu og að þeim loknum var efnt til Friðarvöku þar sem um 1.000 útikerti voru tendruð í kirkjutröppunum til að efla samkennd og sýna
samstöðu í verki. Við erum Akureyringar, Íslendingar og jarðarbúar, var yfirskrift Friðarvökunnar. Ágóði af sölu kertanna rennur
til læknasamtakanna PMRS sem hlúa að stríðshrjáðum á Gaza svæðinu. Niðurstaðan er að bæjarhátíð á
norðurhveli jarðar getur haft áhrif og gert heiminn örlítið betri en hann er í dag.
Akureyrarvaka var sett á föstudagskvöldið með Rökkurró í Lystigarðinum og ýmsum uppákomum í trjálundum hér og
þar um garðinn. Fjöldi bæjarbúa lagði leið sína í garðinn til að njóta veðurblíðunnar og rölta um ljósum
prýdda stígana. Að því loknu var haldið í Draugavöku í elsta hluta bæjarins. Drungaleg tónlist og draugaleg hljóð
ásamt kynjaverum af öllum gerðum sköpuðu réttu sviðsmyndina. Þar tóku íbúar virkan þátt ásamt 100
sjálfboðaliðum sem brugðu sér í gervi drauga.
Bæjarbúar létu ekki sitt eftir liggja á Akureyrarvöku en margir þeirra mættu með nestikörfu og góða skapið til að
njóta samveru við nágranna sína í hverfislautarferð. Þessi nýi og vinalegi viðburður er kominn til að vera. Fyrir utan ótal
listviðburði og uppákomur um allan bæ vekur athygli hversu mikið hátíðin skilur eftir sig af skreytingum og útilistaverkum af ýmsum toga.
Ástralski vegglistamaðurinn Guido van Helten vann alla helgina að því að mála stóra veggmynd á norðurgafl Amaróhússins við
göngugötuna í miðbænum. Á myndinni er Sigríður Sigtryggsdóttir á ungaaldri að leika Dimmalimm hjá Leikfélagi Akureyrar.
Sigríður lést árið 2010. Í Listagilinu skreyttu níu listamenn hvern sinn hluta af vegg, handan götunnar við Ketilhúsið, og bak
við veitingahúsið Rub 23. Áður en hátíðarhöldin hófust var listaverkið Sigling eftir Jón Gunnar Árnason fært úr
miðbænum að nýjum göngustíg meðfram sjónum við Drottningarbraut og kallast þar skemmtilega á við hið fræga verk
Sólfar eftir sama höfund við Sæbraut í Reykjavík.