Heilsugæslustöðin á Akureyri

Börn, sól og hiti

Wed, 12 Jun 2013 19:22:00 +0000

Núna þegar sumar og sól hefur tekið við af löngum vetri er vert að minna á að börn eru viðkvæm fyrir sól og hita. Heilsugæslan gaf fyrir nokkru út bækling um góð ráð fyrir börn í sólarlandaferðum og hvernig hægt er að verja þau fyrir sólbruna og njóta ferðarinnar. Mörg þessara ráða eiga við hér á norðurlandi þessa daganna.

Sumarafleysingar á heilsugæslunni

Wed, 12 Jun 2013 19:17:00 +0000

Núna eru starfsmenn heilsugæslunnar að byrja að fara í sumarfrí eins og aðrir landsmenn. Sumarafleysingafólk er að taka til starfa, sumir vanir og aðrir óvanir. Búast má við einhverjum breytingum af þeim sökum en vonandi geta flestir íbúar notið sumarsins og góðrar heilsu og sloppið sem mest við að þurfa að leita til heilsugæslunnar á komandi vikum.

Áhyggjur af stöðu barna með geðraskanir

Mon, 03 Jun 2013 15:38:00 +0000

Læknaráð Heilsugæslustöðvarinar á Akureyri hefur sent frá sér ályktun til heilbrigðisráðherra og stjórn FSA þar sem það lýsir yfir miklum áhyggjum af stöðu mála varðandi börn og unglinga með geðraskanir á Norðurlandi. Þjónusta við þau er í verulegu uppnámi og ástandið alvarlegt. Læknaráðið skorar á hlutaðeigandi aðila að ganga í að leysa þetta mál áður en verður um seinan. Verði það ekki gert, er ljóst að það mun hafa alvarlegar afleiðingar í för með sér.

Endurnýjun lyfja fyrir skjólstæðinga barna- og unglingageðdeildar

Wed, 29 May 2013 19:39:00 +0000

Heimilislæknar munu aðstoða FSA við lyfjaendurnýjanir fyrir börn sem nutu þjónustu barna- og unglingageðdeildar þar til úr rætist með mönnun deildarinnar. Forráðamenn barna sem eru skráð hjá heimilislækni geta leitað til heilsugæslunnar með einfaldar lyfjaendurnýjanir. Þau sem ekki eiga heimilislækni eða þarfnast breytinga á lyfjagjöf er bent á göngudeild barnadeildar með lyfjaendurnýjun.

Lifrarbólgufaraldur rakinn til frosinna jarðarberja

Wed, 29 May 2013 19:23:00 +0000

Niðurstöður rannsókna á uppruna lifrarbólgu A faraldursins í Skandinavíu gefa til kynna að frosin jarðarber séu orsakavaldur lifrarbólgu A tilfella, sem greinst hafa í nær hundrað neytendum á fjórum Norðurlöndum á undanförnum mánuðum.