Grunnskólarnir á Akureyri taka nú þátt í Stóru upplestrarkeppninni í 10. sinn. Hefð hefur skapast um að halda lokahátíð keppninnar í Kvosinni í Menntaskólanum á Akureyri og verður hún haldin þar í dag, miðvikudaginn 17. mars og hefst kl. 17.00.

Borgarafundur verður haldinn í Deiglunni fimmtudagskvöldið 18. mars kl. 20.00 undir yfirskriftinni "Samheldnin í akureyrsku samfélagi". Þar verður leitast við að svara spurningum eins og þeim hvort samheldnin geti orðið samfélagi okkar til tjóns eða hvort við getum virkjað hana okkur til góðs á tímum þrenginga.

Listmálarinn og myndskáldið Tryggvi Ólafsson mun eiga samtal við nemendur listnámsbrautar Verkmenntaskólans á Akureyri (VMA) og aðra gesti í Ketilhúsinu föstudaginn 19. mars klukkan 14.50. Þessi viðburður er í tengslum við opnun á sýningu verka Tryggva í Listasafninu á Akureyri. Sýningin er unnin í samvinnu við Listasafn Tryggva Ólafssonar á Neskaupsstað.