Død snø (Dead Snow), Noregur 2009 - (9/10)
Hryllingsmyndir / hrollvekjur hafa ávallt vakið áhuga minn. Hrollvekjur á öðrum tungumálum en ensku hafa ekki endilega ratað mikið í tækið hjá mér en síðustu misseri hefur þetta verið að breytast. Á skömmum tíma sá ég myndir eins og Naboer og Fritt vilt 1-2 og skemmti mér mikið. Það var því spenningur kominn í mig þegar ég stakk Død snø í tækið og hafði eiginkonuna með mér í áhorfinu.
Þetta er án efa með skemmtilegustu hrollvekjum sem ég hef séð. "Snilldin ein" voru ummæli sem komu í huga minn eftir að áhorfi var lokið. Ég kannast ekkert við neitt af þessum leikstjórum eða leikurum, en það er kannski málið ... maður fær þarna ferskan blæ í annars afar sterílan flokk - og viti menn: útkoman er yndisleg hrollvekja með miklum blóðsslettum og húmor og hlátrasköllum. Þetta fer ekki alltaf vel saman og dettur mér helst í hug myndir eins og Scream sem voru fyndnar (alla vega mynd númer eitt) en höfðu horror-dæmið með sér líka.
Og þegar
þú ert að tala um hrollvekju með nasista-uppvakningum ... þá ertu í virkilega góðum málum. Auðvelt hefði verið að
klúðra þessu, en leikstjórinn og handritshöfundurinn Tommy Wirkola gerir það alls ekki.
Söguþráðurinn er á þá leið að ungir krakkar koma saman hátt uppi í norskum fjöllum, á mjög eyðilegum stað, til að skemmta sér og skíða og sleðast. Fljótlega fer þó að bera á dularfullum verum þarna í snjóugum fjöllunum og nasista-uppvakningarnar herja á krakkana, sem reyna að komast undan eða berjast við þá. Tekst þeim að flýja eða lenda þau í blóðugum dauðdaga?? Þið verðið að sjá myndina til að fá svarið við því.
Sterkasti hluti myndarinnar er handritið; húmor og spenna, sem er sannarlega komið til skila með skemmtilegum persónum í höndum óþekktra en virkilega skemmtilegra leikara. Þessi mynd minnti svolítið á Fritt vilt myndirnar en var miklu betur unnin og miklu skemmtilegri.
Það er því með mikilli ánægju sem ég gef þessari mynd 9 af 10 í einkunn og hún er nær því að hækka í 10 heldur en að lækka. Þetta er mynd sem allir unnendur hryllingsmynda ættu að sjá, sérstaklega ef þeir vilja smá "tvist" í annars sterílan flokk!
