Líkt og undanfarin ár taka félagar úr Skógræktarfélagi Eyfirðinga á móti fólki í skógræktinni á Laugalandi á Þelamörk tvær síðustu helgarnar fyrir jól. Þar getur fjölskyldan valið sér jólatré, sagað það niður og þegið á eftir ketilkaffi eða kakó og jafnvel piparkökur með. Ketilkaffið, sem líka er kallað skógarkaffi, er hitað yfir eldi að skógarmannasið og notalegt er að hlýja sér við snarkandi eld með rjúkandi kaffi eða kakó eftir gönguna um skóginn.
Stundum er fjölskyldan fljót að finna tré en oft kemur fyrir að skógargangan verður drjúg og vangaveltur miklar, jafnvel dálítil átök, áður en draumatréð fellur. Hvað sem því líður verður þetta alltaf skemmtileg tilbreyting á aðventunni og æ fleirum finnst hún ómissandi hluti af jólaundirbúningnum. Þetta árið verður skógarfólk á Þelamörk helgarnar 10.-11. og 17.-18. desember frá klukkan 11-15.
